Тетово: При напад врз полициската станица "Боговиње" кај Тетово, изутринава е убиен 35-годишниот полицаец Фикри Елмази од тетовското село Теново. Секторот за внатрешни работи во Тетово се уште трага по десетчлената група што го изврши нападот утрово околу шест часот.

Тетово: Во градот и околината ноќеска се слушаа истрели кои престанаа околу пет часот. Според Секторот за внатрешни работи во Тетово, рафални и поединечни истрели се евидентирани од реонот околу Текстилниот училишен центар "Ѓоше Стојчевски", од околината на Спортскиот центар и касарната "Кузман Јосифовски - Питу", Теќето, населбите Горна Чаршија и Вонвардарска, како и од селата Теарце, Пршовце, Доброште, Шемшево, Лисец, Гајре, Палатица, Требош, Озормиште, Стримница, Непроштено, Слатино, Челопек и Радиовце.

Тетово: 45 минути по полноќ, во тетовското село Челопек била нападната полициска екипа од банда составена од тројца вооружени и добро опремени терористи. Бандата отворила оган врз полицајците - припадници на резервниот состав кои реагирале брзо и енергично возвраќајќи на нападот. Во оваа вооружена пресметка еден од терористите бил убиен, додека другите двајца биле ранети и пренесени во Ургентниот центар во Скопје.

Според МВР, патничко возило БМВ 320 со светло-зелена боја и странски регистерски таблички било забележано од месното население еден ден порано, околу 22,30 часот. Возилото се движело низ селото, во неколку наврати скршнувало од главните улици и се задржувало во близина на куќи на резервни полицајци од Челопек. Двајца полицајци заедно со неколкумина други припадници на резервниот полициски состав од селото, распоредувајќи се по главниот селски пат на неколку места до стоматолошката ординација "Медидент". Пред да почнат престрелките, возилото се приближило до местото каде што се наоѓале полицајците, а тие се обиделе да го сопрат заради контрола. Во истиот момент од возилото во правец на полицајците бил истрелан еден рафал кој, за среќа, не погодил ниту еден од нив. Како што соопштува МВР, полицајците веднаш возвратиле. Вооружената пресметка траела речиси еден час. Засега за идентитетот на тројцата напаѓачи ништо официјално не се соопштува, а се зборува дека еден од нив носел прекар Џаџи. СВР- Тетово, по наредба на истражен судија при Основниот суд, извршило увид. Притоа, на патот кон Долни Челопек било пронајдено возилото. На совозачкото место имало убиен неидентификуван човек во црна облека со амблем на АНА и пиштол калибар 7,62 мм. Телото на убиениот потоа било пренесено околу пет часот утрината во Службата за судска медицина при Медицинскиот центар во Тетово. Во возилото бил пронајден цел арсенал оружје, муниција и друго. Според МВР, пронајдена е една автоматска пушка од кинеско производство со две рамки со муниција за автоматска пушка, потоа четири пакувања муниција за автоматска пушка со сто куршуми, еден мобилен телефон, црна маска, рачна радиостаница и исечоци од дневните весници во врска со убиството на полицајците во Гостивар. До возилото биле пронајдени уште еден пиштол калибар 7,62 мм и рамка со куршуми. Кај еден од двајцата ранети била пронајдена легитимација од УНМИК на име Неџдет Рамаи од Косово, издадена на 28 март 2001 година.

Скопје: Гранична патрола на АРМ открила магацин со оружје и воена опрема во скопското село Танушевци додека ја обезбедувала државната граница кон СР Југославија во делот кон Косово, информираа во македонската Армија. Според АРМ, патролата на првата гранична бригада го нашла оружјето околу пладне, во импровизиран подземен магацин во атарот на Танушевци. Извори во безбедносните служби тврдат дека оружјето што било најдено е најверојатно останато од минатата година додека во овој дел од земјава имаше воен конфликт. Тие велат дека најденото оружје и муниција се кородирани и речиси неупотребливи од тоа што подолго време стоеле под земја.

Тетово: Во тетовскиот регион во текот на изминатата ноќ континуирано се слушаа истрели од повеќе видови пешадиско оружје од реони во градот и од голем број села. Според полицијата, истрели зачестено имало и од возила во движење, но во ниту еден случај тие не биле упатени кон директни цели. Во 17,50 часот во Тетово одекна силна детонација која наидуваше од јужниот дел на градот. Според СВР Тетово, детонацијата е од активирана експлозивна направа во близина на Штуловиот универзитет и Државното средно училиште "Моша Пијаде". Извршен е увид и утврдено е дека детонацијата била предизвикана од рачна бомба.

Тетово: Повеќе канонади од рафални и поединечни истрели се евидентирани од реонот околу градскиот плоштад, поштата, Домот на АРМ, Основното училиште "Братство Миѓени", реонот околу касарната "Кузман Јосифовски -Питу", складот на општинскиот одбор на Црвениот крст, улицата "Ленин", од населбите Циглана, Купеник, Горна Чаршија и Вонвардарска, како и од околината на Медицинскиот центар.

Тетово: Во текот на изминатата ноќ во тетовскиот регион се слушаа истрели од повеќе видови пешадиско оружје, чиј интензитет беше намален околу полноќ. Рафални и поединечни истрели во текот на ноќта се евидентирани од централното градско подрачје во Тетово, од реонот околу Текстилниот училишен центар "Ѓоце Стојчески", Медицинскиот центар, касарната "Кузман Јосифовски - Питу", населбите Горна Чаршија, Вонвардарска, Купеник и Циглана, месноста Расадиште крај патот Тетово - Попова Шапка и од поголемите станбени комплекси.

Gore

Copyright © 2002 "МАКЕДОНСКО СОНЦЕ"