ФОТОГРАФИИ СО ЖИВОТЕН ПУЛС

На изложбата се застапени преку стотина експонати кои претставуваат само мал исечок на едно време, преку кои треба да се препознае душата на Вевчани. Авторот е вљубеник во него и тој неуморно го следи во сите негови сегменти. Особено жали по она што го нема веќе, што исчезнало во времето, но е особено горд со тоа што го овековечил на своите фотографии.

Господинот Ќушкоски се нашол во магиското поле на фотографијата, а повеќе од 20 години тој е неразделен од својот фотоапарат. Во неговиот опус ќе се најдат и многу необични фотографии кои можат да се родат само кај автор со префинет вкус. Неговите фотографии не се само документ за еден момент, за едно време, туку и своевидни уметнички дела. Илјадници мигови на запрено време заземаат место во неговата богата фототека.

Тој преку фотографиите ги овекувечува свадбените обичаи, крштевките, молитвите, покладните огнови, василичарите, богатата македонска носија, старата архитектура, околината на Вевчани со нејзините величенствени извори и планинските врвови на Јабланица. Меѓутоа, неговото творечко љубопитство не застанува овде. Тој проникнал и во други многубројни состојби навидум незабележителни, притоа откривајќи со голема умешност необични форми и детали што ги нуди околината. Во тој миг господинот Ќушкоски не ја регистрира само формата на објектот, туку внесува и душа во него. Сеедно дали станува збор за камен, дрво или куќа што пропаѓа, тој наоѓа во нив теми кои остануваат овековечени преку неговиот објектив.

Сите фотографски записи кои си нашле место во неговата збирка се забележани при бројните патувања. А ги има од секаде, од пределите на Јабланица, од кањонот на Радика, од македонските светилишта, античките базилики, старата архитектура, па дури и мотиви од Азурниот брег, ноќите на Монте Карло, шпанското село и од други места. Глетки кои допрва треба да се најдат пред љубителите на оваа уметност, а авторот досега има презентирано само мал дел од оваа ризница на фотографии и дијапозитиви.