Во просториите на Државниот архив на Република Македонија, беше отворена изложба под наслов "Прогонувани, затворани и осудувани за самостојна Македонија". Изложбата се состои од околу 300 фотографии и документи од политичките досијеа на лицата прогонувани, осудувани и затворани за самостојна и независна Македонија. Изложбата е организирана од Здружението на граѓани и политички прогонувани, а ја отвори Паскал Гилевски.

Во Отвореното графичко студио при Музејот на град Скопје беше отворена изложбата "Кружни сеќавања" на Дијана Томиќ - Радевска. Изложбата претставува видео-инсталација составена од две видео-проекции од кои едната е директно врз ѕид, а другата врз маска-отпечаток од лицето на авторката.

Ликовниот уметник Киро Урдин, кој живее во Белгија, одржа самостојна изложба во реномираната светска галерија "Гај Питерс" во Монте Карло, каде се поканети околу 20.000 еминентни гости од Европа и светот. Изложбата која ќе биде отворена до 21 октомври за прв пат му се случува на еден Македонец.

Делата на седумгодишниот Стефан Плескуњиќ беа претставени пред полската публика. Изложбата е сочинета од 18 дела од овој млад автор.

Ресенската керамичка колонија, како единствена членка од нашава земја на Меѓународната академија за керамика при УНЕСКО (една од десетте професионални асоцијации од целиот свет), присуствуваше на годинашнава Генерална асамблеа во Атина, Република Грција. Ова беше за прв пат организирана Балканска изложба на современа керамика, окарактеризирана од самиот организатор, како "врв" на културните случувања на Асамблеата. Ресенската керамичка колонија ја претставуваше Република Македонија преку делата на Владимир Аврамчев, Михо Лазаров и Душан Мишевски.

Современата македонска скулптура, со сите нејзини фази и менувања на изразноста, е изложена во Музејот на современата уметност. Проектот има наслов "Преобразби 2", а автор во реализацијата е Соња Абаџиева. На изложбата се застапени 30 автори со 50 дела - скулптори, сликари , архитекти, односно сите оние кои дејствувале во насока на менување на традиционалното лице на скулптурата.

Македонскиот фотограф Боро Рудиќ, во Солун, во галеријата на Гете институтот, презентира дел од своето творештво, 45 црно-бели фотографии на тема "Град". Изложбата е пренесена од Турција каде беше поставена во Инстанбул, Бурса, Кочаели и Кајсери.

Во просториите на Културниот центар "Крижанка", Државниот архив на Р. Македонија ја презентира изложбата "Македонија низ вековите" која содржи околу 30 паноа и 280 документи и фотографии. На изложбата се претставени најважните историски личности и настани од историјата на македонскиот јазик.

Во салата на музичкото училиште во Тетово, во присуство на бројни посетители и членови на семејството на загинатиот, беше претставена книгата - монографија "Нашиот херој Цоки" од Гојко Ефтоски. Книгата е посветена на Цоки Стојановски, припадник на полициските единици, загинат во минатогодишните настани. Самиот автор за делото вели: "Мојот напор беше колку е можно поавтентично да го прикажам животниот пат на Цоки".

Во салата на киното "Козјак" во Куманово, се одржа промоција на двете книги од првиот претседател на Република Македонија, Киро Глигоров. Станува збор за следниве наслови "Македонија е се што имаме" и "Атентат - ден потоа".

Во Домот на културата "Кочо Рацин" во Кичево промовирана е монографијата "Црквите и манастирите во Кичевското архиерејско намесништво" од новинарот на Радио Кичево, Светлана Вељаноска. Притоа, архиерејскиот намесник и старешина на Соборниот храм "Свети Петар и Павле", протојереј-ставрофор Ѓорѓи Лапоски, меѓу другото рече дека за прв пат е направен приказ на четирите кичевски парохии со своите цркви и манастири, со што 82-те светилишта им стануваат уште поблиски на верниците.

Институтот за македонски јазик "Крсте Мисирков" промовираше три изданија. Станува збор за "Девербативните именки во македонските црковнословенски ракописи" од д-р Лилјана Макаријоска, "Лексиката на Станиславовиот пролог" од м-р Катица Трајкова и "Темпоралната карактеристика на финитните глаголски конструкции во југоисточните македонски говори" од м-р Убавка Гајдова.

Со "Парите се отепувачка" и со "Филм" Битолскиот театар гостува на Фестивалот "Театарот на крстопатот" во Пловдив. Овој театар, исто така, гостуваше и во "Иван Вазов" во Софија.

Во Домот на културата "Марко Цепенков" се одржа првото издание на Фолк-фестивалот "Низа 2002". На него настапија плејада од познати фолк-пејачи од македонската естрада.