СЕ РОДИ НАЈПОЧИТУВАНАТА ДЕВА НА СВЕТОТ

"Јас сум Оној Кој говореше преку апостолите, светителите и учителите. Јас сум Оној кој говори и кој ќе говори до крајот на времето преку Црквата Моја света. Јас сум Оној кој говори и за кого се говори".

Се роди на земјата, Царицата небесна, Пресвета Богородица, по татко и - по потекло од царски род (по потомство од цар Давид), а по мајка и - од архијерејски род (од родот Аронов). Нејзините родители, светите праведни Јоаким и Ана, веќе остарени, често тагувале, оти и по 50 години брак, Бог не ги благословил да имаат своја рожба. Но, "онаму каде што сака Бог, се менуваат законите на природата". Заради љубовта, Бог ги менува законите. Постојат, а како да не постојат. Бог го испратил Свети Архангел Гаврил - благовесникот, да ги извести светите Јоаким и Ана дека ќе им се роди: "Ќерка преблагословена со која ќе се благословат сите народи на земјата и преку која ќе дојде спасението на светот". Бог направил големо чудо и Света Ана зачнала.

На 8.09 по стар календар (или на 21.09. по нов календар), во малото галилејско гратче Назарет, Света Ана родила ќерка, на која и ставиле име Марија - име кое значи мила на Бога. Нејзините родители го исполниле ветувањето пред Бога. Ја однеле во манастир на тригодишна возраст. Св. Јоаким починал на 80-та година од својот живот, а Света Ана во својата 79-та година. Марија многу тагувала за смртта на родителите. Во храмот останала 12 години. Кога наполнила 15 години, според тогашните закони требала да го напушти храмот и да се омажи.

Но, таа пред свештениците изјавила дека до крајот на животот се ветила да остане девојка и да му служи на Бога. Затоа тие ја однеле во домот на старецот Јосиф од Назарет. Кога Марија ја читала книгата на пророкот Исаија се чудела која е таа девојка за која пишува: "...Ете, Девица ќе зачне и ќе роди Син, и ќе му го дадат името Емануел", што значи Бог е со нас. Тогаш Архангел Гаврил испратен од Бога и открил дека Таа е девојката одредена од Бога да го роди Синот на Севишниот: "Радувај се, благодатна! Господ е со тебе! Благословена си ти меѓу жените!...и ете, ти ќе зачнеш во утробата и ќе родиш Син, и ќе Го наречеш со името Исус. Он ќе биде голем и ќе се нарече Син на Севишниот". Марија му одговора на ангелот: "Еве ја слугинката Господова; нека ми биде според зборовите твои!".

Оттогаш и преку Неа, преку Таа непозната галилејска Дева, преку Нејзиното мајчинство и Нејзината крвна врска со Исус Христос, "ќе започне да се извршува тајната на спасението на светот". Да ја погледнеме иконата на празникот "Рождество на Пресвета Богородица" кој уште се вика и "Мала Богородица". Да ја погледнеме со нашиот духовен поглед. Ете, гледаме, на постела лежи жена која штотуку родила ќерка. Името на жената е Ана. Крај ќерката стои таткото. Името му е Јоаким. Близу до постелата на Ана жени го вршат првото миење на новородената Марија, "новородениот најчист и највозвишен плод на човечката историја". Целиот човечки род, во целиот свет, на сите човечки јазици, со радост да го празнуваме "Рождеството на Пресвета Богородица" и гласно да го испееме тропарот - химната на Нејзиното раѓање, божествената песна, роденденската песна: "Твоето раѓање, Богородице Дево, радост му јави на целиот свет, зашто од Тебе изгреа Сонцето на правдата - Христос, Бог наш. Уривајќи ја клетвата, ни даде благослов. Уништувајќи ја смртта, ни дарува живот вечен".