Во неа деновиве може да се погледне изложбата "Здивот ме врзува" на Стојан Вујичиќ која се состои од видео-проекција и фотографии создадени во текот на оваа година на повеќе локации низ Македонија и Индија.

Деновиве, во издание на "Култура" од Скопје од печат излезе книгата "Стрип, запис со човечки лик" од Томислав Османли. Станува збор за второ и значително дополнето издание на истоимената теоретска студија посветена на Деветтата уметност (стрипот), што инаку за прв пат се појави во 1987 година.

Во ЦСУ галеријата се промовира книгата "Разбирајќи го Балканот", збирка текстови од истоимената конференција на која учествуваа социолози, философи, историчари, историчари на уметноста, културолози и уметници од повеќе земји на Балканот, што ја организира Центарот за современи уметности - Скопје.

Конференцијата се фокусираше на испитување на интерсекцијата на стекнатите кодови во социјалниот, историскиот, културниот контекст кои се употребувани на Балканот, и промените низ кои нашите општества и култури поминуваат последниве децении.

Нашиот познат писател Петре Бакевски, во издание на сопственото книгоиздателство "Тера магика" ги објави своите нови три драми кои овој плоден автор ги издава мошне бргу по претходната драмска трилогија. Првата драма е насловена "Кралот е повторно жив". Втората "Еврипид се враќа во Атина", а третата "Дом за птици".

Во Скопје беше промовирана книгата "Окупирани - непокорени" од авторот Миле Стефановски. Книгата претставува своевидна хроника за животот на еден млад скопјанец во периодот пред и за време на Втората светска војна.

Во Домот на културата "Бели Мугри" во рамките на годинешната културна манифестација "Кочански денови на оризот" се одржа промоција на книгите "Ноќни ракатки" од Никола Игнатов и "Кочани во себе те носиме" од Костадин Романов и Ванчо Петров - Фафа. Книгата "Ноќни ракатки" ја промовираше Вангелија Цавкова, а промотор на "Кочани во себе те носиме" е Благој Пенов.

Претставата "Арт", која ја подготвуваше режисерката Зоја Бузалкова, а е работена според текст на Јасмина Реза, беше одиграна во културниот простор "Точка". Улогите ги играа Васил Зафирчев, Игор Стојчевски и Горан Трифуновски. Претставата е во продукција на "Проарт".

На сцената на Народниот театар во Штип премиерно беше изведена најновата претстава "Гард" од Трајче Кацаров, во режија и сценско оформување на Симеон Гаврилов.

Во улогата на Нико Фока настапува Младен Крстевски, Невена, неговата жена ја игра Марија Гавриловска, соседката Јорданка Тодорова, соседот Владимир Тулиев, типот 1 Методија Колоски, и типот 2 Милорад Ангелов.

Меѓународниот театарски фестивал "Млад отворен театар" (МОТ) ќе биде отворен на 28 септември со француската претстава "Квартети" во режија на Жером Тома. "Млад отворен театар" ќе заврши со претставата "Роберто Зуко" од Бернард Колтес, во режија на Иван Поповски.

Во Битола започна 23 Интернационален фестивал на филмска камера "Браќа Манаки". На фестивалот ќе бидат прикажани 15 играни филма и 20 кратки филма. Како новитет е Студентската програма со интернационален карактер. На првиот ден од Фестивалот свечено беше откриен споменикот на Милтон Манаки.

Со гостувањето во Париз, Македонската филхармонија ја започна концертната сезона 2002/2003 година. Со концерт на Камерниот оркестар Македонската филхармонија се претстави со следната програма: Арија од суита бр. 3 од Јохан Себастијан Бах, Дивертименто бр. 2 од В. А. Моцарт, "Елегија" од Е. Елгар, "Аве Марија" од Бах - Гуно, Девет минијатури за гудачи од Благој Цанев (оркестрација Борјан Цанев) и Холберг суита, оп 40 од Е. Григ. Концертот ќе се одржи под диригентство на Борјан Цанев, а солист е Маја Павловска, сопран.