Го определува мандатот за состав на Владата на Република Македонија;

Ги поставува и ги отповикува со указ амбасадорите и пратениците на Република Македонија во странство;

Ги прима акредитивните и отповиканите писма на странските дипломатски претставници;

Предлага двајца судии на Уставниот суд на Република Македонија;

Предлага двајца членови на Републичкиот судски совет;

Именува тројца членови на Советот за безбедност на Република Македонија;

Ги предлага членовите на Советот за меѓунационални односи;

Именува и разрешува и други носители на државни и јавни функции утврдени со Уставот и со закон;

Доделува одликувања и признанија во согласност со закон;

Дава помилување во согласност со закон и врши други функции утврдени со Уставот.

Во член 87 стои дека Претседателот на Републиката е одговорен за кршење на Уставот и законите во вршењето на своите права и должности.

Од друга страна, СДСМ долго време го оспоруваше легитимитетот на Борис Трајковски како претседател на РМ. Го слушам Борис Трајковски кој вели дека нема да се измени азбуката, историјата и границите. Но, тој треба да сфати дека тоа го посакуваат тие што секоја вечер стојат на бината зад него, нагласи Црвенковски во Радовиш на 20 октомври 1999 година на претседателската кампања на Тито Петковски.

За оспоруваниот легитимитет, Трајковски сепак веруваше дека СДСМ ќе го променат својот став и ќе го почитуваат она што значи институција.

Во принцип, оспорувањето на легитимитетот на која било институција во државата не е добра за натамошниот развој на демократските процеси. Сметам, што е и видливо, дека СДСМ ги искористи сите правни процедури во време на изборниот процес и верувам длабоко во себе дека тие ќе го променат својот став и одлука и дека ќе дејствуваат во согласност со демократските принципи и почитувањето на она што значи институција. Јас и во мојот инаугуративен говор кажав дека се обраќам до сите граѓани на Република Македонија и до сите политички чинители, така што нема никакво издвојување, одговори претседателот на Република Македонија, запрашан дали се чувствува како претседател на сите граѓани на државата, имајќи предвид дека СДСМ ја оспори изборната победа. На Трајковски исто така му ја лепеа етикетата дека е "албански претседател" со оглед дека изборите ги доби благодарение токму на албанските гласови. На прашањето дали добиените голем број гласови од припадниците на албанската националност значат и дополнителни обврски кон лидерите на политичките партии на албанската националност, претседателот Трајковски изјави:

"Точно е дека добив поддршка од граѓаните од албанската националност, меѓутоа добив поддршка и од другите етнички малцинства. Она што беше оценето како најпозитивно во извештаите на меѓународната заедница е тоа што токму на тој начин сум избран за претседател на Македонија, односно дека сум општоприфатен од сите национални припадности во земјата, што претставува знак на сигурност".

Сепак, иако на почетокот СДСМ не го признаваше Трајковски за претседател, подоцна имаме затоплување на односите. Особено за време на воената криза во кабинетот на претседателот често беше присуството на Бучковски, Црвенковски, додека од друга страна беше забележливо оддалечувањето на Трајковски од својот лидер Георгиевски.

Претседателот Борис Трајковски од поодамна јавно укажа дека ќе се залага Македонија да ја направи поперспективна и посилна без оглед која политичка партија ја има власта во свои раце.

Доколку на следните избори се појави нова гарнитура на лидери, ќе работам и ќе се борам со нив за да ја направиме Македонија посилна и попросперитетна. Но, никогаш нема да се откажам од моето право да ги бранам интересите на државата, на македонскиот народ и на припадниците на сите националности што живеат во Република Македонија, потенцираше претседателот на Република Македонија, Борис Трајковски, по неговото прогласување за претседател пред македонскиот Парламент.

Дали Трајковски е доследен на она што го зборува и дали и како ќе се вклопи во зацртаната платформа на победничката СДСМ, е секако отворено прашање!