Голем дел од активностите организирани во рамките на овогодишното одбележување на "Европските денови на културното наследство" во Македонија беа насочени кон оттргнување од заборавот на обичаите, верувањата и на духовната култура на Македонија во пошироки рамки.

Духовната култура е овековечена низ различни медиуми - на фотографија, филм, но и во пишувањата на етнолозите коишто со своите проучувања даваат значителен придонес кон документирање на барем мал дел од традициите што опстанале до денешен ден. Во овој контекст и зборникот "Етнологија 2" изобилува со бројни текстови кои говорат за традициите и обичаите кај нас.

Народните музички инструменти свое место си најдоа во трудот на Владимир Боцев. Гајдата, кавалот, дудукот, двојанката, ќеменето, зурлата, сазот, утот егзистираат и денес. Меѓутоа, збирката на народни музички инструменти во Етнолошкиот оддел при Музејот, за жал е малубројна и брои некаде околу 111 предмети.

За народната керамика како значаен сегмент од богатата традиционална култура што се развивала на нашите простори говори во својот текст Трпа Рогановиќ. Свое место во Зборникот си најдоа и трудовите за носиите и нејзините промени, за турско-ориенталниот стил на облекување, употребата на килимот итн.

Во рамките на Манифестацијата беше отворена и изложбата на фотографии од фототеката на Музеј на Македонија насловена како "Македонија низ традициите на секојдневието и празнувањето" која претставува извонреден визуелен документ за живеењето на овие простори во минатото. Почетоците на богатата збирка на фотографии во сопственост на Музеј на Македонија не навраќаат на периодот од доцните 40-ти се до раните 60-ти години на минатиот век. Токму во овој период Етнолошкиот музеј на Македонија оформил вредна збирка на црно-бели фотографии кои ги овековечија најбитните моменти од секојдневниот и обредниот живот во Македонија. Изложбата претставува избор од овие фотографии при што акцентот е ставен на визуелните записи од најраширените обичаи поврзани со Јулијанскиот календар, како и свадбата како еден од најзначајните моменти во животот. Во контекст на обичаите, фотографијата од ваков вид претставува еден од најзначајните елементи од етнолошкиот опис, кој покрај информации за облекувањето и китењето, дава и податоци за антрополошките карактеристики, архитектурата итн.

Покрај промоцијата на Зборникот и претставувањето на изложбата, во рамките на "Европски денови на културното наследство" беа презентирани и документарни филмови од областа на етнологијата "Староверци" од Јана Севчикова од Чешка, "Мисионери и моќ" од Рашел Иса Џеса од Норвешка и "Во името на Господ" од Владимир Боцев од Македонија. Во македонскиот филм презентирано е изведувањето на обичајот "курбан" во неколку различни етнички области во Македонија. Во него се обработува взаемното влијание на религијата и обичаите како и влијанието на обичаите и местото што тие го заземаат во животот на човекот.