Во Музејот на град Скопје Игор Митриќески претстави дел од творештвото, а ова е негова втора самостојна изложба. Авторот се претстави со четиринаесет слики работени во акрилик на платно, изработени во 2001 година и триесеттина цртежи работени во последните десетина години.

Во галеријата "Флора-арт" по повод декадата на културата на мирот на УНЕСКО беше отворена изложба "Цвеќе на мирот за соседите од мојата улица" од Живко А. Поповски - Цветин. Следуваше подарок за секоја куќа, а на програмата беа застапени музика, поезија, фолклор...

Во Уметничката галерија Бања Лука, Република Српска, беше отворена ликовна изложба на сликарката Тања Балаќ. Станува збор за нејзино десетто самостојно претставување, а на изложбата е презентирано нејзиното творештво (педесетина дела - цртежи и слики), работени во последниве пет години.

Во двата салона на Културно-информативниот центар беа отворени две изложби, графики на Христо Керин од Бугарија и цртежи на Нау Ван (Вангел Наумовски) од Охрид. Беа претставени 29 цртежи работени во периодот од 1995 година до денес.

Под наслов "Големо врамување" беше отворена изложба од триесетина дела, од седумнаесет македонски уметници. Кураторот на изложбата, Емил Алексиев, со овој проект претставува дела на претставниците на сосем различи генерации. Тие се изработени во различни техники, а она што ги обединува е специфичниот однос кон телото, транспонирано во слика и бескрајната игра меѓу рамките кои ги одредуваат сликите што владеат во просторот на сликата и самата слика на човечкото тело.

Македонските уметници Оливер Мусовиќ и Славица Јанешлиева изложуваат на биеналната манифестација Меморијал "Надежда Петровиќ" во Чачак. Годинешната манифестација прв пат е со меѓународен карактер, а темата е "Приватен простор - јавен простор".

Поетот Бранко Цветкоски по вторпат со избор од неговата поезија е преведен на српски. Насловот на новиот поетски избор на српски е "Молитвени дашак" ("Молитвен веј"), по првиот, исто така избор, озаглавен "Небеска места" ("Небески места").

Издавачката куќа "Детска радост" ги претстави своите најнови изданија. Во овој дел од продукцијата на "Детска радост", поместени се следниве наслови: Избрани дела во три тома од Киро Донев, "Творештвото на Стојан Ристески" од Васил Дрвошанов, "Цеца" од Илија Аџиевски, "Девојката реката" од Илија Тодоровски, "101 подвижна игра" од Слободанка Газепова и Симеон Ренџов, "Пинокио" од Карло Колоди, во превод на Наташа Сарџовска, "Европа" од Рене Калиски, во превод од Лилјана Котевска - Плевнеш и "13 небаксузни приказни" од Кузман Кузмановски.

Книгоиздателството "Матица македонска" ги објави првите четири томови од едицијата "Прилози за наставата по литература". Книгите имаат обем од 2.500 страници, во кои се публикувани опширни анализи за над двесте дела од најпознатите светски класици и современи писатели кои се изучуваат како задолжителна литература.

Истакнатиот македонски книжевен преведувач и лингвист Трајко Стаматоски во Друштвото на писателите на Македонија ја доби повелбата "30 Септември" за долгогодишното успешно преведување капитални прозни дела. По повод Светскиот ден на преведувачот се одржа и Свечен собир на македонските книжевни преведувачи.

Во Центарот за поддршка во Велес, во организација на Здружението на слепите лица беа промовирани првите книги на македонски јазик, а печатени со Браевото писмо. Станува збор за романите "Пиреј" од Петре М. Андреевски, "Црно семе" од Ташко Георгиевски и "Камена перница" од Ристо Ѓ. Јачев.

На сцената на Народниот театар "Војдан Чернодрински" од Прилеп, премиерно беше изведена претставата "Комши капиџик" од Сема Али, во режија на Иван Јерчиќ. Станува збор за интернационален Проект кој се реализира со екипа на млади актери кои доаѓаат од неколку регионални земји: Бугарија, Хрватска, Турција, Југославија и Македонија.

На сцената на Театарот на народностите, премиерно беше изведена претставата "Елин" од Теодора Димова, во режија на Ана Таканен од Шведска. "Елин" е драмски текст за деца кој беше развиен во "Работилницата за писатели" во Охрид минатата година. Станува збор за посебна програма на Детскиот театарски центар за развивање на нови драми за деца, поддржана од Швајцарската агенција за развој и ФИИО Македонија.

Тања Кочовска повторно доби награда на Интернационалниот фестивал на театри за деца во Суботица. Жирито никако не можеше да ја заобиколи и овојпат и ја даде наградата за најдобро актерско остварување за Бојанка во "Чук, чук Стојанче" што Коле Ангеловски ја режираше во Театарот за деца и младинци по текстот на Оливера Николова.

Македонскиот пијанист Симон Трпчески дебитираше со концерти во Америка. Тој свиреше со Симфонискиот оркестар на Сиетл, каде настапи со Концертот бр. 2 на Рахмањинов, а диригент е Лоренс Ренес од Холандија. На програмата уште е и Симфонијата бр. 6 од Чајковски.

Директорот на фотографија од Бразил, Валтер Карвањо, за филмот "Лево од таткото" е добитник на наградата "Златна камера 300",, која ја додели битолскиот Фестивал на филмската камера "Браќа Манаки". Втората награда, односно "Сребрената камера 300", отиде во рацете на италијанскиот директор на фотографија Лука Бигази за филмот "Оган во ветрот", а трета, "Бронзена камера 300" ја доби директорот на фотографија Габор Медвиѓи од Унгарија, за филмот "Искушенија". Жирито додели и специјална награда за камера на Силвија Каје, за фотографијата во францускиот филм "Уште повисоко".