Американскиот Стејт-департмент во Меѓународниот извештај за верските слободи констатира дека македонската Влада ја користела религијата во политички цели, а поставувањето на крстот на Водно од етничките Албанци е видена како "провокација". Во истиот документ политизацијата на религијата се поткрепува со примерот кога на специјалните полициски сили им се врачувани верски плочки како и присуството на претставници на МПЦ за благословување на спортски и други настани.

По четири години од почетокот на изградбата, досегашниот потпретседател на Владата, сегашен пратеник Џевдет Насуфи, го предаде во употреба автопатот Скопје - Тетово. Предавањето беше означено со почетокот на работата на наплатната рампа кај селото Желино.

Томислав Стојановски - Бомбај, претседател на Демократската партија на Македонија, апелираше што е можно поскоро да се реши проблемот со "Даме Груев" во тетовското село Шемшево, во чиј двор е истакната биста на Албанецот Јумни Јонузи. Бомбај покрај другото ќе го напуштел Тетово поради, како што истакна, "притисокот од СДСМ".

Поранешниот владика Јован за само седумнаесетмесечно управување со Повардарската епархија, за лични потреби од парите на локалните цркви и манастири присвоил околу 120.000 евра, тврдат црковни извори. Официјална полициска потврда нема, но Пописната комисија формирана по разрешувањето на владиката Јован записнички констатирала дека во зградата на Епархијата недостигаат многу предмети меѓу кои и моторни возила, компјутери и друго.

Петнаесет дена по ноќниот упад во студиото на "Радио Тумба" и претепувањето на новинарот Зоран Божиновски од, како што изјави Божиновски, припадници на специјалната единица "Лавови", во СВР Куманово нема други позначајни резултати околу откривањето на сторителите. Познат е само фактот дека е приведен и веќе процесуиран за натамошна истрага во Истражниот затвор во Шутка главниот осомничен Горан Трајковски - Тајто кому му е изречена мерка притвор во траење од 30 дена. Истрагата најмногу "се влечка" околу потрагата по фамозниот бел голф без регистерски таблички.

Политичките партии што влегоа во Парламентот ќе си поделат по 15 милиони денари, сметано на еден милион гласови и 15 денари од добиен глас. ДИК доби 110 милиони денари, но тој износ ќе биде ребалансиран за една третина повеќе. Според некои проценки, кампањата на поголема политичка партија чинела 500.000 евра, а само еден голем митинг 15.000 евра.

Веронауката и официјално стана дел од наставната програма на основците од трето одделение, кои доброволно избрале да го учат овој предмет. И во Македонската православна црква и во Исламската заедница веруваат дека веронауката ќе ги зближи децата од различни конфесии.

Аце Коцевски, градоначалник на Општина Велес, се закити со "Зелено јаболко" кое му го додели Друштвото на екологистите на Македонија, а велешката Топилница го доби "Гнилото јаболко". Коцевски благодарение на подршката на екологистите го доби признанието, а Топилницата поради индиферентноста се закити со "црната титула".