Од друга страна, пак, членот на преговарачкиот тим од Коалицијата "ЗА", Радмила Шекеринска, тврдеше дека бавноста во преговорите се должи на тоа што партнерите досега не соработувале и дека им требало време да се запознаат. Постоела можност, како што изјави таа, преговорите да траат кусо и да бидат неуспешни. Тие можеле да бидат побрзи, ако не дискутираат за владината програма, ако не дискутираат за деликатните прашања, но според Шекеринска, лошите резултати од таквата одлука ќе биле многу брзо видливи. Затоа, тие се одлучиле да се издржи и да се има квалитет во загарантираните рокови, да не брзаат, за потоа резултатите на така договорената влада или коалиција да не бидат негативни. Според неа, овој тип на коалиции бара време за разлика од, како што објаснува таа, претходните коалиции кои биле подготвувани подолг период пред избори, дури и за време на изборната кампања. Овојпат станувало збор за партии кои немале искуство во меѓусебна соработка и биле со различни позиции. Причина за одолговлекувањето на преговорите се и предлозите кои, како што посочи Шекеринска, се менувале во од. Сите ресори се решавале во пакет, односно ниту едно министерство не било коалициско решено, т.е станувало збор за "пакет" предлози кои ДУИ можело или немало да ги прифати.

Преговорите се одвиваа на три новоа: програмата, поделбата на ресорите и кадровските решенија. Како куриозитет од преговорите за составување на новата влада беше тоа што Теута Арифи и Агрон Буџаку им преведуваа на Шекеринска, Поповски и на Манасиевски додека говореше Муса Џафери (еден од преговарачите од ДУИ), бидејќи тој разбирал македонски, но не можел да зборува.

Двата преговарачки тима во текот на преговорите постојано ги одбегнуваа конкретните одговори на новинарските прашања. Долго време го почитуваа договорот информациите да ги чуваат во рамките на преговарачките тимови и потенцираа дека не сакаат да ги водат преговорите преку медиумите. Поради тоа, јавноста можеше да си шпекулира со имињата на идните министри. Според тие шпекулации, претставниците на Коалицијата "За Македонија заедно", Радмила Шекеринска од СДСМ и Јован Манасиевски од ЛДП на своите колеги од ДУИ, Теута Арифи и Агрон Буџаку им предложиле неколку варијанти за поделба на ресорите, но соодносот, како што беше и претходно објавено, е 10 министерски места за Коалицијата "ЗА" и четири за ДУИ, но и едно вицепремиерско место за партијата на Ахмети. Иако Буџаку потенцираше дека нема големи разлики меѓу ДУИ и СДСМ и дека тие што ги има брзо ќе се надминат, објаснувањето за тоа зошто долго време ги кријат имињата на идните министри, тој го објаснуваше со џентлменскиот договор да не објавуваат детали за преговорите додека тие не бидат завршени. Долго време се тврдеше и тоа дека Демократската унија за интеграција од понудените ресори ги одбрала министерствата за правда, за образование и за транспорт и врски, (за транспорт и врски биле заинтересирани и СДСМ и ЛДП поединечно), а инсистирала на Министерството за надворешни работи. Првите три министерства биле на списокот што преговарачите од Коалицијата "За Македонија заедно" им го понудиле на ДУИ, додека Министерството за надворешни работи не и било понудено на партијата на Али Ахмети. Коалицијата "ЗА" побара конкретни имиња за ресорите што ги бара ДУИ, а испрати и порака дека не прифаќа чепкање во големата министерска четворка. Долго време во игра беа и Министерството за локална самоуправа и Министерството за животна средина и просторно планирање. Бидејќи овие министерства и беа понудени на ДУИ, партијата на Ахмети имаше право прва да избира, а ресорот што ќе остане да го добие ЛДП.

Преговорите помеѓу Коалицијата "ЗА" претставувана од Радмила Шекеринска од СДСМ, Јован Манасиевски од ЛДП, како и Никола Поповски кој по добивањето на спикерската функција се повлече од преговорите, и Теута Арифи, Агрон Буџаку и Муса Џафери од ДУИ, најнапред започнаа околу платформата и принципите за новата влада. Иако и двете партии се договорија за враќање на мирот и безбедноста, намалување на невработеноста и на сиромаштијата, борба против корупцијата, криминалот и тероризмот, прашање на време е колку ќе го исполнат она што за што се договорија. Мандатарот Црвенковски ќе мора да го исполни она што го вети, бидејќи како што и самиот изјави свесен е дека народот знае да казнува.

Како приоритет на новата влада, според владината платформа усвоена од двете партии, е и завршувањето на приватизацијата и преиспитување на постапките завршени досега, ефективна децентрализација на власта, интегрирање на сите етнички заедници во државните органи, особено во безбедносните структури, забрзано интегрирање на Македонија во НАТО и во Европската унија. Меѓу темите кои според "ЗА" и ДУИ бараат ургентно реагирање, покрај реформите во администрацијата, е и реинтегрирањето на регионите опфатени со конфликтот лани. Меѓу најзабележливите делови од владината програма е точката во која се вели дека партнерите ќе прават напори што поголем број прашања да се решаваат со консензус. За реализирање на проекти кои бараат ангажирање на повеќе ресори, како на пример разоружување или децентрализација, владините партнери предвидуваат формирање фондови и служби од привремен карактер. Не е исклучено со вакви проблеми да координираат и некои од вицепремиерите.

И според Шекеринска и според преговарачот од ДУИ Агрон Буџаку, ставот на СДСМ дека нема место во власта за командантите на ОНА, ќе дојде на дневен ред кога ќе почнат разговорите за имињата кога ќе се вклучи и мандатарот, и ставовите на одделните партиски раководства.

До затворањето на овој број од нашиот неделник, Црвенковски се уште официјално не беше вклучен во преговорите, иако е сосема јасно дека тој според зададените рокови ги врши последните консултации за персоналниот состав на владата. Официјалната изјава дадена од преговарачкиот тим гласи дека тој ќе се вклучи во разговорите кога ќе бидат во игра и имињата на идните министри.