Во ликовниот салон "РУ" во Работничкиот универзитет "Јоска Свештарот" во Струмица беше отворена изложбата "Актот во делата на струмичките уметници". На изложбата, која претставува редовна годишна програма на овој ликовен салон, се претставија 12 ликовни творци од сите генерации со 30 дела работени во разни сликарски техники.

Душан Доцевски од кумановскиот фотоклуб "Козјак" е добитник на првата награда за колекција фотографии. Првата награда за фотографија ја доби Емин Кумбараџи од скопскиот клуб "Елема". Во младинска категорија, првата награда за колекција на фотографии ја доби битолчанката Александра Јурукоска, а за фотографија - скопјанецот Дарин Ангеловски.

Триесетина ликовни портрети на наши истакнати писатели, сопственост на Друштвото на писателите на Македонија, никогаш не биле изложени за пошироката македонска јавност во ниту една галерија во земјава. На ѕидовите во ДПМ во моментот има портрети на дваесетина книжевници и на неколку преродбеници - членови на Друштвото, кои ги изработиле наши познати ликовни уметници, по нарачка. Веле Смилевски, претседател на писателската Асоцијација, вели дека сликите се уште не биле презентирани јавно, зашто досега никој не покренал таква иницијатива.

Во книжарницата на "Детска радост", беше отворена изложба на книги од Република Украина. Изложбата се одржува по повод месецот на книгата, а во организација на редакцијата на "Детска радост" при НИП "Нова Македонија" и Амбасадата на Република Украина во Република Македонија.

Изложбата ја отворија Павло Кирјаков, амбасадор на Република Украина во РМ и Киро Донев, писател, директор и главен уредник на "Детска радост".

Во Отвореното графичко Студио при Музејот на Скопје беше отворена изложба на десетмина уметници.

Изложбата насловена како "Телото мисли" претставува преиспитување на спротивставеноста меѓу телесниот и умствениот аспект на човековата егзистенција, а во контекст на современите општествени случувања. Делата на уметниците се работени во различни медиуми: инсталации, графики, дигитални цртежи, перформанси, видео-проекции....

Во културната локација "Точка" во тек е изложба на црно-бели фотографии на Филип Базин. Изложбата "Жени активистки во прекугранична акција" е дел од истоимениот Проект. Досега фотографиите биле изложени во Приштина, Сараево, Белград, Подгорица, а по Скопје ќе биде изложена и во Љубљана.

Стихозбирката "Критична точка" на поетот Петар Т. Бошковски донесува седумдесетина наслови поделени во пет раздели. Во неа авторот говори за болката, моминската солза, утринскиот ѕвон, сигурноста на вечноста, желбите, љубовта....

Во рамките на оваа едиција поетски остварувања, што ги објави книгоиздателството "Култура" од Скопје, поместена е и поетска објава на Јадранка Златанска - Ѓоргиева, насловена како "Песочен брег". Авторката својата прва стихозбирка под наслов "На крајот од патот" ја објавува во 1998 година во "Мисла", а еве сега издавачката куќа "Култура" го објавува ова нејзино најново поетско остварување.

На сцената на Драмски театар, се случи долгоочекуваната премиера на "Есперанца". Оваа претстава, чиј креативен тим ја одигра пред мал број свои колеги и луѓе од театарската сфера, својата официјална премиера ќе ја доживее за петнаесетина дена, откако ќе биде завршено комплетното реновирање на Драмски театар, кое се уште е во тек.

Македонската филхармонија, во Домот на армијата одржа симфониски концерт со гости од Германија, диригентот Патрик Штруб, редовен гостин кај нас и виолинистката Елизабет Вебер. На програмата беа Концерт за виолина и оркестар во а-мол од Антонин Дворжак и Симфонија бр. 1 во е-мол од Јан Сибелиус.

Во организација на Дирекцијата за култура и уметност - Скопје во Музеј на град Скопје се одржа концерт на Даниел Апостолов кој свиреше на фагот и Владимир Млинариќ кој доаѓа од Република Хрватска, а свиреше на пијано. На програмата беа дела од А. Вивалди, Г. Џејкоб, Т. Зографски, К. Сен-Санс, Е. Елгар и О. Нусио.

Во Соборниот храм "Св. Климент Охридски" на 19 октомври ќе настапат градскиот младински хор "Менада" од Тетово, мешан хор на КУД "Стив Наумов" од Битола и женскиот младински хор при хорското студио "Рустико" од Скопје. Диригенти на концертот ќе бидат Ивица Зориќ, Љубомир Трифуновски и Запро Запров.

Таткото и синот Зафир и Васил Хаџиманови ќе ја претставуваат Македонија на Интернационалниот фестивал на шансони "Загреб 2002". На таа реномирана музичка манифестација, која ќе се одржи на 18 и 19 октомври годинава, македонските музички уметници, кои живеат во Белград, ќе настапат со шансоната на Зафир Хаџиманов, "Маргарета". Таткото Хаџиманов е и интерпретатор, а Васил ќе го придружува на пијано.