Одговор за овој горлив проблем се очекува од надлежното Министерство за земјоделство, шумарство и водостопанство. А одговорот со нетрпение го очекуваат и најдиректно засегнатите во случајот, се разбира земјоделците, кои не можат да го соберат својот посеан труд по нивите.

"Поради постојаните врнежи постои можност проблемот со собирање на културите да се провлекува и понатаму. Најтежок е проблемот со жетвата на оризот, бидејќи е многу зголемено нивото на вода на оризовите полиња, па се заканува опасност од намалување на приносите на оризот, а и она што ќе се собере нема да биде со многу добар квалитет", истакнуваат во агрослужбата на Управата за хидрометеоролошки работи. Според одговорните во Службата, најголема штета ќе претрпат лозарите и винарите кои ќе треба да преработуваат грозје со низок квалитет, поради пониската шеќерност и поради присуството на штетници, гниење на грозјето во лозовите насади. Другите видови земјоделски култури, како што се овошките и градинарските култури, полесно ќе се соберат, бидејќи нивната неинтензивна обработка остава повеќе простор да се влезе во нивите и тие да се соберат.

Земјоделците, но и агростручњаците, предупредуваат дека во прашање е доведена и есенската сеидба што поради интензивните врнежи од дожд се одлага за неопределено време. Најголема пречка за есенската сеидба е преголемата влага во почвата која го оневозможува нормалното одвивање на сеидбените активности. Сите подготовки за сеидба се направени, односно подготвени се и земјоделците и комбинатите, но се чека дождовите да престанат и земјата малку да се исцеди од вода за да може да се влезе во нивите и да се почне со примена на агротехнички мерки за посејување на површините.

Во источна Македонија не можат да се соберат градинарските култури, што ќе ја остави конзервната индустрија без суровини за работа, а во Кочанско е прекината жетвата на оризот. Во Свети Николе не е собрана луцерката, а во Тетовско остана несобран гравот од нивите. Во Пелагонија не е собрана шеќерната репка, грозјето во Кавадаречко остана на лозите, а тешко се изведува и бербата на јаболката.

Сето ова според неофицијални оценки ќе ја чини земјава повеќе од милијарда денари. Од Министерството за земјоделство има најава за формирање тимови што би требало да ја оценат состојбата на теренот, за да се изнајдат и мерки за надминување на сегашните состојби, вели Вељо Тантаров, претседател на Сојузот на земјоделци на Македонија.

Кај тутунарите во Прилепско половина род е уништен, а штетите се проценуваат на 300 милиони денари. Во Струмичкиот регион е отежната бербата на пиперките. Во винарската визба "Тиквеш" каде што досега се откупени само 18 милиони килограми грозје, истакнуваат дека на лозјата скапуваат уште околу 4-5 милиони, за кои е мошне неизвесно дали ќе се приберат ако не се подобрат временските услови. Бербата се одвива во мошне тешки услови, така што дневниот прилив е 150-200 тони, со што станува сосема извесно дека оваа ќе биде една од најнеродните години. Во винарската визба "Бовин" во Неготино веќе е завршен откупот на грозјето. Поради лошиот квалитет откупени се само 250 тони, а биле планирани 500. Над 10.000 тони десертно грозје во Гевгелиско ќе остане на нивите и наместо на пазар ќе заврши во винарските визби. Врнежливото и студено време во овој крај не само што ја прекина бербата, туку и го забрза гниењето на "килибарот", "хамбургот" и италијанскиот "мускат", кои се најзастапени. Од очекуваните 15.000 тони во овој крај, проценето е дека досега не е собрано и пласирано на пазарот ниту една третина.

Со ваквиот епилог на собирањето на плодовите на земјоделските култури се заканува опасност од добивање катастрофални резултати од годинешното земјоделско производство. Влажниот и студен бран, регистриран последниве месеци битно влијаеше и врз квалитетот на тоа што е собрано, кое е исто така во намален обем. Потфрлувањето на грозјето, поради ниските зимски температури забележани во минатата година, ја заокружија целината на намален род со лош квалитет. Имено, врнежливото време го намали процентот на шеќер во грозјето, а земјоделците, поради страв од целосно скапување на тоа што е останато на лозовите насади, предвреме собраа најголем дел од родот. Остатокот од грозјето, посебно во Гевгелискиот регион, остана во лозјата, па и тоа што се очекува дека ќе биде собрано, ќе оди во винарските визби, наместо на пазарот.

Огромните штети во земјоделството предизвикани од обилните дождови можно е да ја спречат и пролетната сеидба, затоа што земјоделците ќе останат без пари, предупредуваат стручњаците. Екипи на Министерството за земјоделство, шумарство и водостопанство интензивно работат на терен и се уште ги проценуваат штетите. Надлежните во Министерството велат дека е погодено целото земјоделство, но најкритично е во струмичкиот регион.

Поради лошите временски прилики нема да може да се надополни загубеното во поглед на сеидбата на есенските култури. И она што беше изорано е обраснато со трева, што значи дека нивите повторно ќе мора да се заоруваат, а тоа ќе значи поголеми трошоци за добивање на идната реколта на житните култури, констатира Тантаров.

На нива остана да гние половина од родот, а дождот е виновник на пролонгираната есенска сеидба која според планот требаше да почне на 20 октомври и да се реализира на 180 илјади хектари.