Во Париз беше отворена заедничка изложба на македонскиот сликар Сергеј Андреевски и на Дик Робертс од САД, со наслов "Вистината помеѓу двајца". Изложбата ќе трае до крајот на месецов, а изложени се петнаесет слики работени во акрил-техника.

Во Салонот 2 при Културно-информативниот центар беше отворена изложба на Ричард Милошевски. На својата втора самостојна изложба Милошевски се претстави со слики и графики.

Во Изложбениот салон во Музејот во Неготино во тек е изложба на Ѓуро Варга. Во најавата за изложбата Владимир Величковски пишува: "Сликовните претстави на Варга се комбинирани со обликувани букви на англиски составени зборови со кои се нагласува значењето на темата и на пораката во овие слики. Зголемените букви формираат зборови кои во превод значат 'мир', 'живот', 'деца', 'љубов'..."

Зоран Јакимовски, декан на скопскиот Факултет за ликовна уметност, учествуваше на првиот интернационален Симпозиум за сликарство, кој се одржа во грчкиот град Патра. Уметниците - директори и професори од 22 земји од светот - создаваа големи слики (еден ипол на три метри) на тема "Олимписки дух и Олимписките игри низ вековите".

Еденствениот магазин целосно посветен на културите на балканските земји, "Балканис", деновиве излезе во Љубљана, Словенија. Во него на неколку страници има текстови посветени на Скопје и на македонската култура.

На 47-от Меѓународен саем на книгата во Белград македонските издавачи се претставуваат на заеднички штанд со своите заеднички наслови. Комесар на Саемот е м-р Павле Петров, претседател на Здружението на издавачите и книжарите на Р. Македонија и генерален директор на "Просветно дело".

Во Друштвото на писателите на Македонија беше одбележана стогодишнината од раѓањето на познатиот македонски писател Стале Попов. За неговото творештво и личност зборуваа д-р Томислав Тодоровски и Георги Сталев, а фрагменти од опусот читаа Лилјана Стоилковска и Симон Беличанец.

Книгоиздателството "Матица македонска" од Скопје деновиве го објави петтомното дело посветено на македонската народна митологија од д-р Танас Вражиновски. Во ова издание, кое е од фундаментално значење за македонската наука и култура, поместени се следниве наслови: "Народна митологија на Македонците", "Фолклорни и етнографски материјали", "Народна демонологија на Македонците", "Народна традиција, религија, култура" и како круна на овие четири книги е "Речникот на народната митологија на Македонците".

Во Народниот театар од Битола, премиерно беше изведена претставата "Јерма" од Лорка, во режија на Багријана Попова. Во неа настапија Валентина Грамосли, Петар Горко, Огнен Дранговски, Габриела Петрушевска, Јоана Поповска, Лилјана Илиевска, Соња Ошавкова, Јулијана Стефанова, Менка Бојаџиева, Ратка Радмановиќ, Радојка Димеска и Зоран Талевски.

На четвртиот фестивал на монодрамата кој се одржува во Битола, изведени се осум монодрами од повеќе земји. Фестивалот го отвори "Верица меѓу сливите", на белградската актерка Светлана Бојковиќ, во режија на Тања Мандиќ - Ригонат.

На концертот на Македонската филхармонија, во Домот на АРМ, гостуваше виолинистката Ирина Бачкова од Русија. Со концертот диригираше Леонид Николаев, а на програмата беа увертирата "Светол празник" од Римски - Корсаков, Концерт за виолина и оркестар од Хачатурјан, а за прв пат во Македонија беше изведена "Виулица" од Свиридов.

На четирите концерти што македонскиот пијанист Симон Трпчески ги одржа во Сиетл, САД, минатата недела пред вкупно 10 илјадна публика, буквално бил поздравен со овации и неколкупати враќан на сцената. Трпчевски настапил со Симфонискиот оркестар на Сиетл под диригентство на маестро Лоренс Ренес од Холандија. Го извел Концертот бр. 2 на Рахмањинов. Сите концерти биле распродадени во рекордно време.

Во Салонот 19,19 на Културно-информативниот центар, концерт одржа виолинистот Леонид Пејсахов во пијано придружба на Надежда Пожарицкаја - Пејсахова. На програмата се дела од Бах, Шуберт, Леклер и Дебиси.

На почетокот на идниот месец фолк-групата "Биоритам" ќе замине за Германија. Тие во германскиот град Дизелдорф ќе одржат концерт по повод 25-годишнината од постоењето на македонскиот клуб "Гоце Делчев".

Веднаш по враќањето од Германија "Биоритам", трет пат оваа година, ќе замине на голема турнеја за САД. Во Детроит ќе имаат повеќе настапи поврзани со католичкиот и православниот Божиќ, а таму ќе ги минат и новогодишните празници.

Документарецот "Радост на животот" во режија на Светозар Ристовски ја доби наградата за најдобар документарен филм од странско производство на филмскиот Фестивал "Земјата на виното" во Калифорнија.

Фестивалот "Земјата на виното" е еден од најзначајните фестивали во САД.

Во "Холидеј Ин" свечено беше промовиран филмот "Огледало" кој е посветен на уметноста на Тања Вујисиќ - Тодоровска. Балерината Тодоровска, првенка на балетот, во текот на својата кариера добитник е на повеќе професионални и државни признанија.