Во Музејот на современа уметност беше отворена изложба на Оливер Мусовиќ. Изложбата насловена "Соседи2: Дворот" премиерно беше презентирана на годинешната меѓународна манифестација на млади уметници "Манифеста" во Франкфурт. Овој Проект на Мусовиќ претставува продолжение на "Соседи" со кој во 1999 година учествуваше на Истамбулското биенале. Вниманието на авторот е фокусирано врз луѓе и случки во неговото непосредно опкружување. Тој ги набљудува соседите, без директно да ги претстави.

Триесет и третата графичка изложба на Друштвото на ликовните уметници, беше отворена во Народната и универзитетска библиотека "Св. Климент Охридски". Презентирани се триесетина дела од исто толку автори, работени оваа година.

Во продажниот ликовен салон на Културно-информативниот центар во Скопје, беше отворена изложба на готови керамички производи, сликани со ладни бои, дело на Кристина Тарабунова. Средствата од продадените експонати ќе бидат наменети за манастирот "Св. Наум Чудотворец" од населбата Радишани крај Скопје.

Во организација на Регионалниот центар за соработка "Спектар" од Крива Паланка во Домот на културата беше отворена изложба од создадените дела на Меѓународната ликовна колонија "Македонија - културен мост". На изложбата беа претставени триесетина експонати изработени од повеќе ликовни уметници.

Во Музејот на град Скопје беше отворена изложба на педесетина дела на ликовниот уметник Александар Станковски, чијашто последна самостојна изложба јавноста можеше да ја види во 1997 година.

По претставувањето на книгата се одржа разговор на тема: "Јазик, идентитет, држава".

Во Битолскиот театар во тек се подготовките на претставата "Животот на Цезарите". Проектот е на театарот "Кампагњел" од Хамбург во чии рамки работи групата Шокејс бит ле Мот.

Премиерата на претставата ќе биде во декември, а екипата има покана за учество на Интернационалниот фестивал "Еуроказ" во Загреб идната година.

Драмата на Македонскиот народен театар гостува во Белград и во Нови Сад. На сцената на Народно позориште од Белград, ансамблот на нашата национална куќа ја одигра претставата "Балканот не е мртов" од Дејан Дуковски, во режија на Александар Поповски. Претставата беше одиграна и на сцената на Народно позориште од Нови Сад. Гостувањето се реализира како резултат на договорот за соработка потпишан меѓу МНТ и другите национални театарски куќи од Балканот.

Во Салонот на Македонскиот народен театар со премиерната изведба на грандиозната претстава "Дон Џовани" од Моцарт, под диригентство на Оливер Балабурски беше отворена оперската сезона. Режисерка е Карла Штаубертова - Штурм, а солист во улога на Дон Џовани е Вратислав Криж, двајцата гости од Чешка. Дизајнот - сценографијата и костимите - е на Зоран Рунчев, Македонец којшто живее и работи во Велика Британија.

Со јубилејниот концерт во Домот на културата во Крива Паланка, Културно-уметничкото друштво "Карпош" ја одбележа триесетгодишнината од своето постоење и активно фолклорно творење. Фолклорниот ансамбл "Карпош" во изминатите триесет години успешно се претставуваше на повеќе домашни и меѓународни фолклорни фестивали низ Европа и Азија.

Во хотелот "Александар Палас" Тоше Проески го промовираше најновиот албум "Ако ме погледнеш во очи". Претходните два беа насловени како "Некаде во ноќта" и "Синот божји".

Искра Шукарова учествува со свој труд, изработен како дел од нејзината магистерска работа во Лондон, на 16. Интернационална конференција за танц којашто се одржува на Крф во Грција. Како член на ЦИД-Унеско, Шукарова за прв пат како претставник од Македонија презентира работа од областа на теоријата на танцот на ваков вид конференција.

Во Домот на армијата Македонската филхармонија одржа симфониски концерт со солистот на пијано Маја Кастратовиќ. Диригент на концертот беше Борјан Цанев, а беа изведени делата од Сибелиус, Равел и Брамс.

Фондацијата "Небрегово" која се занимава исклучиво со проучувањето на животот и делото на Блаже Конески, неодамна ја објави првата книга за великанот на македонската наука и култура. Книгата насловена "Студии и огледи за Конески" е збирка на текстови од повеќемина македонски и странски автори со кои се дава широк преглед на творечкиот опус на авторот. Книгата е поделена во неколку тематски целини: јазик, литература, поезија и култура. На крајот од книгата во блокот Одгласи се сеќавањата на Антон Слодњак за среќавањата со Конески во три различни животни периоди, потоа критики за неговата литературна дејност од врвни светски писателски и критичарски имиња, како и библиографија за тоа каде и кога се објавени текстовите за него.

 Документарно-играниот филм "Бакни го сонцето", копродукција на продукцијата "Дион" при "Скрб и утеха и МРТВ, по сценарио на Тихомир Стојановски, а во режија на Владо Денчов, ќе биде прикажан на меѓународниот Филмски фестивал во Измир, Турција. На Фестивалот кој трае од 19 до 30 ноември, ќе бидат прикажани преку 150 филмови од повеќе земји. "Бакни го сонцето" во кој играат актерите Страшко Милошевски, Александар Шехтански, Кристина Атанасова, Едмонд Сотир и други, е на програмата на 26 ноември. Филмот зборува за правата на Македонците во Албанија. Ова е петти меѓународен фестивал на "Бакни го сонцето" (Сараево - Босна 2001, Бар - Црна Гора 2001, Олмоук - Чешка 2002, Солун - Грција 2002).