На сето ова генералниот директот на ЈП "Македонски железници", Владимир Соколовски, одговара дека во штрајкот се вмешани поранешни раководители коишто сакаат пак да дојдат до позиции и ги отфрла сите обвинувања на синдикалците.

Останува само нејасно зошто Соколовски, ако е чесен и исправен како што се претставува, не дозволува да се направи отчет на неговото досегашно работење? До средувањето на состојбите домашниот патнички сообраќај ќе биде редуциран, додека меѓународниот и товарниот сообраќај се одвиваат беспрекорно.

Имаме информации дека трошоците за патувањата на директорот изнесуваат околу 130.000 германски марки според земените дневници. Бараме ревизија на сите реализирани јавни набавки, склучените штетни договори за Претпријатието и објаснување за скапите патувања, истакна Борче Георгиевски, претседател на Автономниот синдикат на железниците.

Според нивните сознанија, споменатиот директор дал 900.000 денари на некоја маркетинг-фирма, а во нивното Претпријатие постои директор за маркетинг кој за таа работа зема плата во висина од 72.000 денари. Според Георгиевски, синдикалците имаат доказ за таквите тврдења.

Покренавме постапка до Јавниот обвинител и повикавме финансова полиција за да се направи ревизија на финансиското работење на Соколовски и неговиот менаџерски тим, потенцираше Георгиевски.

Дел од вработените велат дека ЈП "Македонски железници" се во хаос, во колапсна ситуација, без нафта, без резервни делови, без масло, со што е загрозена безбедноста на вработените, но и на патниците.

Овој проблем со хаосот на Претпријатието е проблем на сите 3.870 вработени, иако само 1.200 се во официјален штрајк. Нашиот проблем не е поради неисплатената плата, туку ние сме јасни со нашите барања, вели лидерот на автономниот синдикат на железничарите.

Штрајкот на железничарите започна на 17 октомври и досега не може да се претпостави кога тој ќе биде прекинат. Барањата и мотивите на синдикалците се јасни. Според нив, тие имаат целосно право да знаат што се случува со Претпријатието и каде одат нивните пари. Како потврда за несериозноста на директорот, синдикалците го посочуваат неговото заминување на пат во Грција непосредно по започнувањето на штрајкот.

Соколовски е инволвиран во криминални дејствија и тој се плаши од средбата со нас. На нашите досегашни средби тој е доста крут во контактите со синдикатот, тврди Георгиевски.

Според него, директорот Соколовски имал сопствена фирма преку која и ги остварувал повеќето набавки за Препријатието, остварувајќи притоа провизии. Како што ни потенцираше Георгиевски, директорот Соколовски претходно раководел со "Металскиот завод - Тито" и "Раде Кончар" и истите ги довел во хаотична состојба.

За жал, сите овие обвинувања на сметка на Владимир Соколовски не можевме да ги потврдиме или демантираме, бидејќи директорот Соколовски, и покрај нашето упорно инсистирање, не ни беше достапен за разговор.

Техничко осовременување на Македонските железници со тенденција за вклопување и постигнување на европските стандарди и интеграција во нив; Зголемување на видот и на квалитетот на услугите; Подобрување на условите на работа, а со тоа и Зголемување на обемот на работа со единствена крајна цел - зголемување на приходот, покрај другото е потенцирано за иднината на ова Претпријатие на веб-страничката на ЈП "Македонски железници". Со денешното темпо на работа и со новонастанатата ситуација, ваквите планови за иднината на препријатието изгледаат преамбициозно.

Како што не информираше синдикалниот лидер на железничарите, моментното редуцирање на домашниот патнички сообраќај се должело на претходните одлуки на Соколовски. За Соколовски немало финансиска корист од патничкиот сообраќај, па така возовите од пет дневно што се обраќале на постојаните релации низ земјава, ги намалил на два. Освен тоа, според Георгиевски, и без штрајк поради немање масло и нафта сообраќајот би се одвивал редуцирано.

По пругите сообраќаат само минимален број локомотиви во домашниот сообраќај, во согласност со колективниот договор на Синдикатот и раководството на "Македонски железници", а сообраќајот на меѓународните линии се одвива нормално.

Штрајкувачите инсистираат на своите барања генералниот директор Соколовски да даде отчет за финансиското работење, со што би се потврдиле или негирале сомневањата за нелегалните и криминални дубиози на раководството.