Во Галеријата "Домисил", во Винстон-Салем во американската држава Северна Каролина, е отворена изложба на слики од уметникот Сергеј Андреевски. Изложени се 20 дела - дел од циклусите "Бакнеж со рибите" и "Париски скици". Најмногу од нив се изработени во техниката масло на платно.

Во Културно-информативниот центар беше отворена изложба на слики "Простор" од Марија Николоска. Делата на академската сликарка се изложувани на повеќе групни изложби и ликовни колонии во земјава и странство.

Во отвореното графичко студио при Музеј на град Скопје беше отворена изложбата "Калиграфијата - визуелна поезија" чиј автор е Драгица Живкова, кустос при Музејот. На изложбата се поместени калиграфски сегменти, испишани на натписните плочи, вградени на надвратниците од објектите изградени во Скопје за време на Османлискиот период.

Во МАНУ беше промовирана Фондацијата "Паскал Сотировски". За научното творештво на академик Паскал Сотировски говореа академик Благој Попов, проф. д-р Ферид Мухиќ и господин Боби Спирковски, претседател на Фондацијата.

Во Салонот 19,19 беше промовирана драмската поема "Апокалипса" од Михаил Ренџов. Делото го промовираше проф. Владимир Георгиевски. Стихови од поемата говореа Софија Гогова - Врчаковска и авторот. "Апокалипса" е во издание на "Блесок".

Во книгата "Скок во новата ера на планетарната уметност" од Добрица Камперелиќ, која деновиве ја публикува "Нолит" од Белград, се застапени фотографии од перформансите на двајца наши уметници - Златко Крстевски и Трајче Блажевски. "Антивоените" перформанси се работени во Македонија како начин на комуникација меѓу нашите и изолираните уметници за време на војната во Југославија.

Во Македонската академија на науките и уметностите беше одржан Свечен собир со наслов "Едновековните корени на МАНУ". Собирот, всушност ја одбележува стогодишнината од формирањето на Македонското научно-литературно другарство основано од македонски интелектуалци во Санкт Петербург. За Санктпетербуршкото другарство и за едновековните корени на највисоката научно-културна установа зборуваше академик Блаже Ристовски.

Под водство на Издавачкиот центар "Три" на Интернет е отворена и првата специјализирана продавница за книги. Веб страницата е њњњ.книга.цом.мк на која се наоѓаат 2.000 наслови (македонски, но и странски). Во Интернет-книжарницата може да се најдат книги од сите жанрови: астрологија, парапсихологија, критики, учебници, речници итн.

Во Драмскиот театар премиерно беше изведена "Есперанца" од Жанина Мирчевска, во режија на Александар Чамински. "Есперанца" е најновиот текст на Мирчевска која живее во Словенија и чии текстови најмногу се поставувани во Словенија, Хрватска и Црна Гора.

По изведбата на театарската претстава "Тетовирани души" на сцената на Драмскиот театар на екипата и беше врачена традиционалната награда на "Нова Македонија" - "Златната плакета 2002". "Тетовирани души" наградата ја доби како најдобра претстава прикажана во рамките на 37. Македонски театарски фестивал "Војдан Чернодрински".

Во Салонот 19,19 при Културно-информативниот центар, настапи дуото на кларинетистот Бранко Павловски и пијанистката Милица Шкариќ, а гостин им беше Мојца Седеу на перкашн. На програмата беа дела од Гобер, Дебиси, Мартину и Нилсен.

Во Домот на АРМ, Македонската филхармонија одржа симфониски концерт со солистот Гзавие Филипс на виолончело, гостин од Франција. Диригент на концертот беше Леонид Николаев од Русија. Беа изведени делата на Гаспаров, Чајковски, Римски - Корсаков.

Македонија како годинашен претседавач на "Аудиовизуел Еурека" е домаќин на петтото издание на "Еурека скрининг". Посетителите, продуцентите, дистрибутерите и другите филмски професионалци од Европа до кои е упатена генерална порака, како и македонските филмаџии, имаат можност да проследат 300 европски филмови, како за големото платно така и телевизиски, играни, документарни и анимирани, стари и нови, долгометражни и краткометражни. Темата на годинешниот скрининг е љубовта, односно љубовните приказни кои ја донесоа особеноста на 36-те земји-членки на оваа Организација.