Авторот на текстот, претставник на Пиринска Македонија, ја проследи древната историја на Македонија и посочи на неправедниот Букурешки договор со кој Македонија беше поделена меѓу трите балкански држави - Грција, Србија и Бугарија, македонското прашање стана уште посложено и позаплеткано.

Прогонетите Македонци од Вардарска и Егејска Македонија, создадоа свои културно-просветни друштва и ансамбли, а бугарските власти создадоа Македонски научен институт во Софија со единствена цел - Македонците да се чувствуваат како Бугари.

По паѓањето на Берлинскиот ѕид, Македонците од Пиринско, создадоа своја организација - Обединета Македонска Организација ОМО - Илинден која и до ден денес бугарските власти одбиваат да ја регистрираат во судот. По тоа се појави ОМО - Илинден - ДД (Демократско движење) која исто не беше регистрирана; ПИРИН, партија за развиток и интеграција на населението, која опстојуваше (како регистрирана во судот) само една година и беше забранета. Сепак, во таа година таа партија се појави на локалните избори и доби две кметски места во село Лески - Општина Хаџидимово и во село Мосомиште - Општина Гоце Делчев, каде има и тројца претставници во местните општински совети (парламенти). Пред осум месеци над 500 ентузијасти формираа нова партија "ОМО - ПИРИН" која се уште чека регистрација од бугарските судски власти.

На големобугарска основа беа регистрирани две организации на ВМРО. Таа на Александар Каракачанов, ВМРО-БНД (Бугарско национално движење), и на проф. Атанас Попов, ВМРО- БДД (Бугарско демократско движење). Меѓу нив разлики во идеологиите нема, а проблемот е кој да ги присвои македонските имоти во Бугарија. Со помош на тие две организации и Македонскиот научен институт во Софија, се краде македонското културно-историско наследство.

На Конференцијата - семинар во германскиот град Баутцен, иако добил покана, не можел да присуствува лидерот на македонското малцинство во Албанија од Друштвото " Мир", проф. Фетаху, поради проблемите кои му ги создале албанските власти со издавањето на визата.

На Конференцијата - семинар имаше претставници на малцинствата од Шведска, Данска, Полска, Австрија, Чешка, Естонија, Литванија, Русија, Словенија, Бугарија и други европски земји. Сите тие дискутираа за проблемите на малцинствата по паѓањето на Берлинскиот ѕид и создавањето на нови држави во Европа.

По разделувањето на Чешка и Словачка, изникнаа проблеми со чешкото малцинство кое остана во Словачка и со словачкото малцинство кое остана во Чешка. Сега како малцинства во двете држави тие се борат за создавање на свои културно-просветни организации, цркви и училишта.

За слични проблеми говореа и универзитетската професорка од градот Талин, Татјана Бушаува и полковник Николај Соловеј. По распаѓањето на Советскиот сојуз и одделувањето на Естонија како самостојна држава, Русите останаа таму, станаа малцинство и имаат проблеми со изучувањето на рускиот јазик во руските цркви и руските здруженија и организации.

Хрвати и Словенци има во Австрија и тие раскажаа за своите проблеми како малцинства. Во скандинавските земји има многу малцинства од таканаречените "словенски" народи кои се населиле таму поради подобрите услови за работа и живот во таа земја, но сакале да го зачуваат словенското потекло и да добијат право да создадат културно-просветни и спортски здруженија.

Домаќини на годинешната Конференција - семинар на малцинства во Европа беа лужичките Срби од градот Баутцен - Германија, кои го прославуваа и 1.000 годишниното опстојување во Германија и 90-годишнина на здружението Татковина. Лужичките Срби во Германија тврдеа дека се постари од благородните денешните Срби во Белград. Тие се радуваат на големите права и слободи кои им се дадени од германските власти. Имаат голем Културно- информативен центар, народни претставништва во локалната и централната власт (Бундестаг), училишта и цркви, а улиците во градот Баутцен се со натписи на германски и лужички (српски) јазик.

Љубезните домаќини приредија одлични услови за спроведувањето на европската Конференција - семинар, кој го организираа за учесниците, а организираа и екскурзија низ градот, посета на градскиот музеј, концерти и еднодневна екскурзија во Германија.