Свети Дионисие Ареопагит, во книгата “За Небесната Ерархија”, ги опишал деветте ангелски чинови. Тие се: шестокрилни Серафими, многуочни Херувими и Богоносни Престоли, Господства, Сили и Власти, Началства, Архангели и Ангели. Секој од овие чинови врши посебна служба. Пониските ангелски чинови се послушни на повисоките. Бог го поставил Свети Архангел Михаил за началник и војвода на сите девет ангелски чинови. Светата Православна Црква од Светото Писмо и Светото Предание ги дознала имињата на началниците на Ангелските сили, а тие се: Михаил, Гаврил, Рафаил, Урил, Салатил, Јегудил, Варахил, Еремил. Свети Михаил на еврејски јазик значи: кој е како Бог, или кој е рамен на Бога? Тој е Првоангел Божји, Архистратиг, Чудотворец, голем Чиноначалник (Старешина) на Небесните Сили. На иконите е претставен како војвода кој во десната рака држи копје, а во левата палмова зелена гранка. Со копјето го допира Луцифер, сатаната. На врвот на копјето има панделка со црвен крст. На некои икони е претставен со терезија во едната рака и огнен меч во другата рака. Светиот Првоврховен Архангел Михаил поседува необична духовна сила и има власт над смртта. Тој е најголем борец против верските ереси и најголем чувар на православната вера. Се спомнува во Стариот и во Новиот Завет. Во книгата на пророкот Данаил, Св. Архангел Михаил е опишан како покровител на Еврејскиот народ. Во Откровението на Св. Јован Богослов е опишан како верен и храбар Архангел Божји. Кога сатаната Луцифер од завист кон Бога, горделиво посакал да биде еднаков со Бога и се откажал од Бога, отпаднал од Бога и со себе повлекол и дел од ангелите. Тогаш настанало страшна војна на небото. Архангел Михаил, храбро застанал на чело на целиот Собор од ангели и извикал: "Да внимаваме! Да застанеме добро, да застанеме со страв. Да стоиме смерно пред нашиот Создател и да не помислиме на тоа што е спротивно на Бога!". Тогаш заедно со него, сите небесни ангелски војски громогласно ја запеале торжествената песна која низ сите векови и ден денес се пее во Светата Црква : "Свет, Свет, Свет, Господ Саваот! Полни се небесата и земјата со Твојата слава; "Поради тоа што ангелите сложно и едногласно запеале славејќи го Света Троица (Отецот и Синот и Светиот Дух), таквото соединување на сите свети ангели добило назив Собор на ангелите. Значи, на 21 ноември, за спомен на овој Собор е востановен овој празник, со кој им се оддава слава на сите небесни војски.

Св. Јован Богослов ја опишува борбата на Св.Архангел Михаил со ѓаволот : "И настана војна на небото: Михаил и неговите ангели војуваа против змевот, а змевот и неговите ангели војуваа против нив; И беше исфрлен големиот змев....сатана,...беше соборен на земјата, и заедно со него и ангелите негови беа исфрлени". Св. Архангел Гаврил значи-крепост Божја. Тој е благовестител на тајните Божји. Св.Рафаил значи-исцеление Божјо или Бог исцелител. Тој е исцелител на болестите. Св. Урил на еврејски значи-оган Божји или светлост Божја. Тој е служител на Божествената љубов. Ја распламтува во срцата љубовта кон Бога. Св. Салатил значи –молитвеник Божји. Св. Јегудил значи-славител Божји. Св. Варахил значи-благослов Божји. Св. Еремил значи-возвишување Божјо. Сите ангели се природа разумна, обдарени со ум и слободна волја, во служба на Бога и спасение на човештвото.