Градот Баргала, односно археолошкиот локалитет, е лоциран на 18 километри североисточно од градот Штип. За него се знае уште од поодамна кога истражувањата за првпат се започнати во 1966 година под раководство на академик Блага Алексова. Во седумдесеттите години на локалитетот работела југословенско-американска екипа кога била откриена епископската базилика. Меѓутоа, еден подолг временски период ископувањата на "Баргала" се во мирување поради немање на материјални средства, но последниве неколку години интензивно се истражува благодарение на финансиските средства кои биле донирани од Министерството за култура. Денес локалитетот се наоѓа во таква состојба што слободно можат да дојдат посетители и да видат многу интересни работи.

Името Баргала етимолошки се врзува за реката Брегалница, а станува збор за еден од позначајните доцноантички градови во Македонија. Проучувањето на градот во литературата е мошне познато, бидејќи постојат поголем број публикувани трудови особено од академик Блага Алексова што значи дека е познат во науката како еден од најзначајните доцноантички градови.

Концентрацијата на истражувањата на локалитетот била насочена кон северозападниот агол на тврдината на утврдениот град, но истражена е само една десетина од целиот локалитет, бидејќи зафаќа површина околу пет хектари.

Во овој период откриен е скоро во целост епископиумот на градот, епископска базилика и нејзиниот дворен простор, во кои се наоѓаат крстилница со мозаични површини, во просторот на бањата сочувани се и делови од мозаик, додава археологот Белдедовски. Потоа откриени се цистерна за вода, а минатата и оваа година откривме и две бањи - доцноантичка голема и мала бања. Споменатата голема бања е лоцирана на просторот помеѓу двориштето на епископската базилика и северозападниот градски бедем. Станува збор за добро сочуван комплексен објект со поединечни простории меѓусебно функционално поврзани. Откривме делови од стопански и станбени објекти, потоа го откривме северозападниот градски бедем со главната порта која е и конзервирана. Покрај архитектурата на градот откриена е богата архитектонска декоративна и скуптурална пластика, како и повеќето доцноантички градови.

Оваа година дојдовме до еден ексклузивен наод за македонската археологија, а тоа е дрворез кој засега не е познат на нашата територија, па и пошироко на Балканскиот Полуостров. Најден е на длабочина од два метра и седумдесет сатиметри и станува збор за дрворез сочуван во фрагменти. Откриен е во префурниумот (простор каде што се складирале дрва за ложење на огништето за загревање на водата и за подното греење) на доцноантичката бања, вели археологот Белдедовски.

По претпоставка на археологот Белдедовски дрворезбата била донесена за горење, меѓутоа поради некое ненадејно рушење и опожарување на објектот резбата била зафатена од пожарот, но поради нејзиното тихо согорување за среќа не изгорела целосно.

Секако дека и "Баргала" има своја некропола затоа што сите доцноантички градови во близина имаат и некрополи, но за жал ние досега немаме поточни показатели за античката некропола. Истражувана е само средновековната некропола што се наоѓа во близина на црквата "Свети Ѓоргија" која ни даде многу значајни наоди; откриени се прстени, накит, обетки, гердани...

За оваа година истражувањата се завршени, меѓутоа досегашните резултати од ископувањата наведуваат дека локалитетот "Баргала" може да обелодени уште многу наоди кои се значајни за македонската археологија.